كلمات اهداء الى صاحب السمو الملكي سلطان بن سلمان ال سعود
بين السهر والليل والقمراء وذعذاع البراد
والدله اللي من رشف فنجالها باله يعود
سامرتها بعد المطر عم المدينه والبلاد
بانت مضاريبه على خد الثرى وبطن النفود
ابلحظةً ايودع المهوم همه والنكاد
يوم حنة البل واختلط مع صوتها صوت الرعود
وتزينت نجد العذيه بالبساتين الجداد
غازلتها قلت العهد لا اغليك واصون العهود
سلام ياسلطان ابن سلمان فيك المدح زاد
نفرش لك اجزال القصائد في مقادمها الورود
با افعالك اتشوش بلد ، وابنظرتك ترعب أسياد
واسمك وصيتك كنه الا فوح مسك وريح عود
امن السطر تبحث عن الكايد وتعشق هالعناد
اعناد عزً ماهو اعناد الضعيف والجحود
يمناك رحمه والجمايل دايم لراسك قناد
لاسيق فنجال المصايب تشربه وتصبح ركود
عينك سما ونظرتك دايم للمشاريف البعاد
يومن غيرك نظرته حول السقف صوب العمود
ياسيدي يوم الفضاء جيته وهو غايت امراد
ضاق الجدي كنه يقول اشلون عن نجمي يزود
هـدك مليكً يدري انك صقر حرن بالهداد
من جيت لدنياء وراسك فوق واتحب الصعود
وان قلت لي ياسيدي في محجرك وش ذا السواد
بقول مخلاب الليالي كم ظروفً جات سود
قيدني الوقت بيدي لو مابيدي حبل وقياد
قيد الظروف انا اشهد انه غير عن باقي القيود
احيان افكر با انسحاب احيان اجاهدها اجهاد
مابين ادور راحتي واخاف من ضحكة حسود
ومن جت يمناه في يمينك زال همه واستفاد
يرجع بضحكه وفرحتن اتعانقه لا ابعد احدود
ياليت ربي كاتبً يهدى العمر بين العباد
واسوق لك عمري يا ابوسلمان وبعمرك تزود
ولايهون قائدنا وملهمنا با الافكار الجداد
ابروئيته احياء بلد زاد الشغف بين الجنود
شبهتنا بطويق يامحمد وشعبك فيك زاد
من الغلا نطرب على صوت المدافع بالحدود
من حاول ايمس البلد ولانوى ذرة فساد
السيف الاجرب سله بيمناه حامي ومحدود
لا ولعت نار وشرار اقبل وخلاها رماد
ذا لاطمً كبد المعادي وخازم اعيون اليهود
تكا على اشداد الفخر ساوى بيمناه الشداد
من ثقلها يمناه لو يهبد جبل صار امهدود
امن الملك خذ هيبته وقوى اعزومه ب ازدياد
وصرامته اعمامه ويقدح مثل قدح الجدود
ما اقول غير الله يديمك يا محمد والوكاد
حنا معك ياسيدي واقدم بنا وارقى سنود
انا فدا لا اغلى وطن واغلى ملك واغلا ابلاد
نذراً علي لا انطح اوجيه اعداه لو قدمي احشود
افخر واماري با الشجاعه والطناخه والعناد
وشلون ما اصير الشجيع وقدوتي ال السعود