كلمات قلبي حبَّك

قلبي حبَّك * وانشغل بك * واشتريت بالدنيا حُبَّك
يـا سـلام لو كنت تعرف * قدّ إيه بافرح بقُربك
يا سلام !
*****
فَـرَّقوا بينـك وبيـني * واشتكيت من طول بعادك
ما لقيت غير دمع عيني * كان عـزايـا في احتجـابـك
والليـالى * عوّدتني ع الأسِيَّة
واشكي حالى * للنسيـم لو فـات عليَّـه
يا سلام لو كنت تعرف * قدّ إيه بافرح بقُربك
يا سلام !
*****
طال غيابك عن عيوني * والحياة وجد وهيام
والْمنـام خاصم جفوني * والشجي إزاي ينام
الْحبـايب * كنت اشوفهم فرحانين
وانت غايب * واللي حـايفـرَّحـني مـين ؟
يا سلام لو كنت تعرف * قدّ إيه بافرح بقُربك
يا سلام !
*****
فتَّحتْ زَهرة شبابي * اللي روّيتها بحنانك
واتنستْ أيـام عـذابي * اللي قاسيتها عشانك
وانت شايف * فرحتي وبهجة زماني
وانـا خـايف * م البعاد والهجر تاني
يا سلام لو كنت تعرف * قدّ إيه بافرح بقُربك
يا سلام !