كلمات لاح براقه

مهرجان المؤسس لاح براقه
كنه يدعي هواة البل باساميها
في ظهر مزنت للخير دفاقه
لين قمنا نردد ( عز واليها )
جاكم الخير ياعشاقة الناقة
قوسكم ماخذاها غير باريها
جهزو كل منتلة وعملاقة
واكحلو عين هاويها ومغليها
حاكم كلنا في ضفة رواقه
من شمال الديار اليا جنوبيها
مثل نجم يسر العين بإشراقه
لأخطت الناس يمتها يقديها
بعد ماراعي البل شانت اخلاقه
وانقطع سوق بايعها وشاريها
إحتما سوقها ثم وسع افاقه
ماتضيع البل وسلمان قافيها
من يشوف الغناة ومامعه طاقه
اغنته ناقته لا باع حاشيها
وعزها اللي له العربان تواقه
راعي الرؤية العظمى وحاميها
من كثر مالعرب لرضاه منساقه
علقت فيه قادتها هقاويها
ماورد للحرايب يبغي ذواقه
ورد يشرب معكرها وصافيها
مثل سيل يبوج الارض صلفاقه
لا وطاله على ارض بان خافيها
فعل جده على درب العلا ساقه
رابط حاضر الدولة بماضيها
شبل عبدالعزيز اللي ثنا ساقه
لين وحد سواحلها وخباريها
كبر داره وكثر اعداه ماعاقه
احتما البل ووردها مفاليها
واعتمدها ضمن خطته وسياقه
وقال هذي حضارتكم ياباغيها
زينة القفر لامن طالت اعناقه
كن ربي ببشت الخير كاسيها
من فقد حاجته واشتد به فاقه
اللحم واللبن وابشوتكم فيها
كيف ما يصير للذيدان عشاقه
والكرم يمتثل في راس مهديها