كلمات رسالة

كلامي زَيّ دَمّي الاتنين طالعين مِن قَلبي

شايل و مْعَبّي و بحاوِل مَكونش سَلبي

بَس بَوصِف حالتي، مِش ذَنب حَدّ لا دي مَسألتي

بَس بحاول احافِظ عَلَى آلتي

سألتي و ياما سَألتي

و ادّيتِك كُلّ إجابة كُنتِ مِحتاجاها

و ادّيتِك من وَقتي و عَقلي و قَلبي قَبل كُلّ حاجة

و مَكُنتِش مستَنّي مِنِّك حاجة، غير بَس الاستجابة

لكلامي

وجودِك كان بالنسبالي كافي

حَرفيًا بَسّ وجودِك

بَسّ وجودي مكانش ليكي كافي

وحَتّى بَعد ما مَرّ الزَمَن لِسّة مَتعافيتش

و كُنت بَوَصَّلِّك احساسي..احساسي

من غير ما اقصُد، خَلّيتِك تخافي

بَعد كُلّ دَه احساسِك بالذَنب اكيد بالنسبالي مش كافي

ف اقل مِن يومين قولت انّي سامِحتِك وانّي تمام

و انتِ صَدَّقتيني لَمّا قولت انّي مُتاعفي

حَطّيتِك في عينيا و اتنازِلت كتير عشانِك

وانتِ مَسهرتيش الليل عشاني
زَيّ ما كُنت بَستَنّاكي

لِلأسَف كان كُلّ هَمِّك تِتشافي بَسّ رَبِّك هوَّ الشافي

كُنتِ زَيّ مَخَدِّتي باردة وقت ما اعوزها دافية

بَس الحَجَر مَبيحِسِّش و الحُبّ مايجيش عافية

ورَبّي ما فاضل فيّا عافية، مَفيش وَلا حاجة شافية

بعين واحدة مَشوفتِش غيرك انتِ ازّاي مَكُنتيش شايفة ؟!

انتِ لُغز، وانا عَجَزت احِلِّك

مَامشيتش بَسّ سيبتِك

مَاقدِرتش انسى بَسّ قادِرلِك

و مش قادر لِنَفسي، توهت وانا بادِلِّك

وانتِ وَصَلتي و بأمان

الشَمس بتِحرَق عيني وانا عيني وَلا ناقصة ولا محتاجة

و نور القَمَر بليل مبقاش بيطَمّني، و مِش مرتاح ع الوِسادة

مَبَقيتش بَحِبّ حاجة، و قَهوتي لِسّة غامقة و سادة

و تمام كُلُّه تمام، بجاوبِك ك العادة

مِن قَبل ما تِسألي
مَتِقلَقيش عيني بِتنام

رجِعت كوَيّس زَيّ زمان، وِسامحت عَ الأيام

و الوَقت اللي فاتني ف حاجات،

مِشّ ليّا و مَسَحت الشات

و مِش مستَنّي مِنِّك رِسالة

مش عايز الإجابة

و مش عايز السؤال

مِش عايز مِنِّك حاجة

انا ف افضَل الحالة

اتمَنّى مَتكونيش محتاجة حاجة..