كلمات ثقة في الله Theqa Fe Allah

من يوم ما اتولدت
وانا عايش في الدنيا بطولي
بتعب واشقي وأشيل في حمول
بلعب دور أكبر من دوري
وبقول يمكن بكره تروق
واطلع من اللي انا فيه وافوق
اتحديت نفسي عشان نفسي
وحلفت لنفسي اكون فوق

وانا انسان عايش علي قدي
بحلم بس الدنيا دي ضدي
عمري ما كنت اناني ومادي
انا راضي بكل الاحوال

اتحديت الدنيا بحالها
قولت انا قدها واكبر منها
واتعلمت ازاي اعاملها
وابقي في يوم بطل الابطال

انا بعمل كل اللي في وسعي
عشان اوصل واقعد في مكاني
مستني الفرصه أما تجيني
وهمسك فيها بأيدي وسناني

بصراحه كده انا شايف نفسي
باصراري وتعبي واحد تاني
ربنا شايف تعبي وعالم
ومسيري احققك احلامي

علي مبدئي انا هفضل ثابت
رامي ورايا وعندي طموح
في ناس بتكسر مقاديفي
ماشيه معايا منين ما بروح
بكره بعون الله هتشوفوا
وانا بنجح واقف في شموخ
وكفايا عليا اني شايفكم
من الحسره قلبكوا مدبوح

انا ماشي في سكتي ومكمل
واكتر من كده قادر اتحمل
هوصل للسما انا مش هنزل
ثقه في الله الجاي نجاح

اللي بيتعب يوم بيلاقي
وانا طول عمري جرئ و فدائي
قولت عليا وعلي أعدائي
هتشوفوا يا حبة اشباح

هفضل احاول واثبت نفسي
لحد ما يجي الحظ معايا
مش هستسلم ولا يوم هيأس
الاصرار موجود جوايا
متراهنوش علي فشلي انا هنجح
طول ما انتوا في دهري وورايا
اصل انا عارف نفسي كويس
انا قصه كبيره وحكايا

التوفيق من عند المولي
وانا بيه أولي عشان شقيان
انا من كتر شقايا وتعبي
كل كلامي علي الغلبان.
مهما الحظ هيديني دهره
انا لسه في ربنا عشمان
الأرزاق ربنا قسمها
وانا من فضله عايش شبعان