كلمات كلمات اغنية الشتاء جونا غير

هبّ البراد وبالشتاء جـوّنا غـيـر
‏ ‏في رُبع خالي مـْن الضجيج العماري
في مهرجانٍ صوبه العالم اتسير
ويفـوح بـ اوبار اللبان الظفاري
دام الشتاء اقبل يسوق التباشير
وجّه طريقك صوب ذيك البراري
لحظة غروب الشمس من بعد العصير
تغنيك عن اكبر مجمّع تجاري
والفجر يوم الشمس بالرمله تنير
تغنيك عن لندن وجزر الكناري

عزله عن الضجّه ونِسمه بها خير
اتساعدك حتى بمحي الاثاري
وجَمعة رفاقة خير واهل ومغاوير
ما عندهم إلا على الخير طاري
سوّوا ضراهم بين جمع السيايير
واتجمعوا من تحت ضوّ القماري

وعلى شبوب النار سوّوا دواوير
ذاك لـ دفـاه وذاك بالبنّ ضـاري
ما حاتوا لجلسه ولا حاتوا حْصير
تهديهم الجلسه رمول الصحاري
والشعر طاب بمنطق كبير وصغير
ما بين متسمّع له وبين قاري
هذي مناة الروح من دون تبرير
ما دام صرت لراحة النفس شاري