كلمات بلد

بَطْلَع عَ الشارع
أفتِّش عَ البلدْ
بَلاقي فُلِّة
مَزروعَة بعِلبِة سَمنة
وشجْرِة غارْ بقُوَّارْ
ووَردِة بِتْعيشْ للأبدْ

بَصحَى مَع البَلابِلْ
والحَق ريحِة خَبيزْ
وانتش حَبِّة فَلافلْ
ومخلَّلَة مِن قَطْرَميزْ1
والقِرفِة عيدانْ
تتدَلَّى بخيطانْ
كإنُه في أملْ
بِجْرار العَسَلْ

بَحُط إيديّي عَ الحيطانْ
واتخيَّل انّو مِن زَمانْ
مَرَقوا عَلَى الحجارْ
قَصَصُ وناس كْتارْ

وانزَل عَلى لِعيونْ مِنْ مَمْرَق الوِدْيانْ
واطلَع لَفوق جْبَالْ معلَّقَة بعِمْدانْ
وزَغْزِلْ عيني تَيصير الشَجَر تَحْتِ السما بِقْواسْ
واصير أنا حودِة2 وحَلِّق عَ بُرج جْراسْ
وبتصير كِفْرِيَّا3 زَيْ بَحَر بعيدْ
وِيصير الكِشِكْ رُمَّان
وِيصير لِتْراب دَهَب وحَديدْ
وِيصير الوَطَنْ إنسانْ