كلمات حبس انفرادي
عيشت جبل حمول مآوي لكل عابر
نفذ صبر أيوب وبرضه أنا لسه صابر
شيلتهم في العيون نزلوا في القاع رواسب
ف عليت بجبلي لفوق و مهمتنيش العواقب
لقيت نفسي أولي و متبقاش غير محاوله
أدور فيها عاللي ضاع مني في أول جوله
فقعدت مع نفسي علي طاوله المفاوضه
و اتوصلت إني في رحله ذهاب بلا عودة
يمكن يكون هروب من الدوشه اللي بره
ايه يعني لوحدي لو هاشتري نفسي ولو لمره
مشوفتش منهم نور فعشقت كحل الضلمة
كشفت فيه دموع تماسيح لكلاب كانت ضالة
ما البكا علي راس الميت لا بيقدم ولا بياخر
وعشان معدنكوا سئ دموع العشره بتتبخر
فابعد أكتر أحاول أهرب من دماغي الاذنبية
أعتكف فقلب صحرا لتآسيس دولتي المثالية
أنسي خطب و مبادئ كنت زمان بيها مأمن
أغلط و أغلط تاني اصل محدش فينا كامل
جايز لما تتفتح النوافذ تتزاح الهواجس
خدوا العصاية وأمشوا وسيبوني لوحدي عاجز
مش إنطوائي لاء بس إنتوا ما تتعاشروش
عيشت لتوصيل الحق طلع الحق فاشوش
هتقول الحق هيكدبوك إكدب هيصدقوك
ياما تعيش مكروه يا تهاجر الكوكب بالمكوك
ملعبتش دور الأمير فملبستش فستان سندريلا
قبل ما يبدأ التحقيق حرقت كل الأدلة
كل اللي بينا كان مجرد كدبه
كانت عارفه إني هسيبها لكن أدمنت أكاذيبها
و أول ما صنعت مركب أهرب بيه من البحيرة
سيبتها في الغرق و كانت مركبتي للشط طايرة
وكان ملازمني تأنيب ضمير إني سبب غرقها
بس رجعت و قولت هي اللي كشفت أوراقها
تبقي فكرة الهروب أهون من المواجهة
ما لآجل سعادتك إستشهدوا جنود عالجبهة
مايكونش جزاتي حبسي و معرفش سبب إدانتي
سبيني لوحدي أنا خلاص أدمنت عتمة زنزانتي
وهي مهدئ بيهديني من الم الحقيقه المره
خدي المفتاح معاكي و عيشي بيه حياتك حره
و متستنيش ميعاد خروجي المصحة مش ناقصة مرضي
إنتي عارفه فين تلاقيني إبقي زوريني كل فترة
بصيت للنص الفاضي و كنت راضي بحبسي الإنفرادي
لحد ما أشوف قصادي سبب إنحداري في الماضي
بس حبس النفس مكنش لبس من ذكريات الأمس
لا بالعكس فادني الدرس كفايه شوفت نور الشمس
كانت لازم العزله أحسن ما أعيش ما بينهم جثه
ينهش فيها أي غراب عايز يدوسها
جسدت الخيال في أنثي و الواقع كان جوزها
جاب الواقع عيال مكنتش حابب أشوفها
فعزفت علي الأجسام لقيت ناس بيعبدوا الأوثان
عملت منهم سيمفونية تصيب الودان بمرض سام
معملتش خير و رميته في المايه آاكل بيه السمك
السيئه بتعم لكن مش كل البشر همج
إعتكافي مع أهل الكهف كان هروب من الشرك
ولما خرجت إتعلمت أعيش بلياتشو في سيرك
في ريح تستريح حكمه بسيطة الفهم
و كل ما تتقفل في وشك في مفتاح لكل قفل
خد الركن و رتب فكر عالم في وشك بكم
إحبس نفسك جوه قمقم و أرضي بالحكم
و أخرج واجه النور بالضلمة إظلم الظالمة
ما دام زرع الياسمين بيحصد شوك فالثمره
بص للنص الفاضي و كون راضي بحبسك الإنفرادي
لحد ما تشوف الماضي بيتحرق رماد رمادي
بس حبس النفس ميكونش لبس من ذكريات الأمس
لا بالعكس يفيدك الدرس كفايه تشوف نور الشمس