كلمات شف للغلا ( غياب )

شف للغلا شي قبل تطول غربتنا
اخاف كثر الغياب وتصعب الجيه
بالله في البعد قل لي ويش حاجتنا
مادام خذنا الزعل حاجه طفوليه
نبغي نموت ف بعضنا دام ما متنا
يازين خل الامور تصير عفويه
لا تفرح الحاسدين بطول صدتنا
لا تنزع القلب وتقطع مجاريه
الارض سكه تعدتها مساحتنا
جيش من الحب خياله ورجليه
اعشوشب القلب وامطر من صراحتنا
وحبال الاشواق معقوده ومطويه
لو افترقنا ياعمري ويش حجتنا
وحنا نشوف الجفا بانت مواريه
الله يوم النجوم تنام ما بتنا
الطرف شاقي وطرف زايد غيه
على بعضنا اذا اقفينا تلفتنا
و كل يغير من اللهفه طواريه
وان كان نيتك تقطع في علاقتنا
ما عاد عندك ياشيخ الغيد حنيه
مرخوص بس خلنا نحفظ كرامتنا
قدامهم نترك الاوضاع عاديه
لا نشوف بعيونهم منا اهانتنا
ونزود الكيه اللي بالحشا كيه
لكن فديتك لا نبطي ما تلفتنا
اخاف من دمعتي لا تهل عفويه