كلمات موال كتاب حياتي
كتاب حياتي ياعين
ماشفت زيه كتاب
الفرح في سطرين
والباقي كله عذاب
اوراقه هم واسى
والحبر من دمعي
كتاب حزين كله ماسي
تاليف زمان غدار اسي
الفرح سطر غلط مكتوب
لما الزمان كان يوم ناسي
مكتوب في اول صفحاته
واحد غريب وادي حياته
هيعيش حزين ويسيبها حزين
امضاء زمن وتحياته
كتب الزمان جواه همي
من غير ما يرحم ويسمي
كتب عليا البكى والنوح
وهان عليه دمعي و دمي
الصحه دابت صفحتها
من الدموع لما قريتها
استكترتها الدنيا زمان
ومن زمان مني خدتها
كشف الحكيم اصبح عاده
ومن عياده لعياده
وكل واحد اروح له يقول
قطعت قلبي بزياده
بدل الحكيم روحت لميه
وخدت كل الادويه
و الكل قالوا على جرحي
ما خدنهوش في الكليه
دلوقت عندي ماتفرقشي
اطيب اروق ولا ما روقشي
العمر عدا و حملي كبير
لو كان جبل كان ما يطقشي
ييجي الطبيب عندي احكيله
يقول سلامتك ادعيله
و لما اقوله ازي الحال
يخبي دمعه بمنديله
يادنيا هاتي كمان هاتي
ما يهمكيش هم حياتي
ما انا اصلي واخد ع الاحزان
والدمع في عيوني ليلاتي
عذاب وهم و توته توته
وادي نهايه الحدوته
بدموع عينيا و احزاني
الدنيا راضيه و مبسوطه