كلمات اول احلامى

تستاهل النادره ترحيب
نبتت على جورة اقلامي
على ثرْاها شجر وعشيب
وطيرٍ على غصنها السامي
في تيّتك يالقصيد اهيب
يتنى مخاييلك الضامي

وانا احتري حفلة اعدامي
حطّيت راسي براس الذيب
وخذيت قسمي من ايامي
جدعت عمري بلا ترتيب
والعمر تاليه مترامي
ساير الوقت بالتلعيب
واقول انا بأوّل احلامي
ما حاصلٍ مثل عمر شعيب

على الملحّى عرض لي شيب
وشلووون شيّبت قدامي ؟!
صوّتت ولا لقيت مجيب
وانا احسب الناس بحزامي
قلّبت قلّ البخت تقليب
ولدّيت في مرتع اوهامي
فتّشت حتى بمخبا الجيب
امار ما فيهم آسامي
تورّشع الصدر مثل الطيب
تقل اتنفّس من بهامي
من خوفي ان الظنون تخيب
خطت المشاوير بأقدامي
ان رحت : مافي مَرَاحي عيب
وان طحت : شالتني عظامي
ياميمتي لا بغيت آغيب
دسّيني بقلبك ونامي
من دعوتك لي بظهر الغيب
بك احتمي ، والله الحامي ..!