كلمات رأى عام Ray Aam

ايه ياجدعان
هو انتوا هتاخدوا فلوس علي نقل الكلام
ايه ياجدعان
هو انتوا معادش وراكوا حاجه غير الكلام

ماتنفخوش في النار بقي وتشعلولها
عايشين عقدكوا علينا ليه بتطلعوها
مش كل مانطفي في حريقه تولعوها
مش قضية رأي عام

ايه ياجدعان
ايه الأستفاده من دا كله حرام عليكوا
ماتسخنوش الدنيا واهدوا الله يجازيكوا
ماتخلوناش ندعي اللي فينا يجي فيكوا
وارحمونا عايزين ننام
حرام عليكوا

كله نازل بخ سم
كله بقي عامل مهم
كله بيبعتر محدش
همه يصلح او يلم

كله بقي عامل ملاك
وقلبه أطهر م السواك
وماشي بيفرق مواعظ
ع اللي قلبه أسود بلاك

كل يوم بوستات عريضه
كله ماسك في الحديده
ماتشوفولكم شغله غيرنا
واعملولكوا حاجات مفيده

كله محسود من خياله
كله هم الدنيا جاله
مين بيحسد طب قولولي
لما كل واحد ف حاله

أيه ياجدعان
في الحياه والدنيا ليه عايزين تكرهونا
ايه ياجدعان
عايزين نعيش في هدوء شويه بقي أرحمونا

كل واحد فينا فيه اللي مكفيه
عايزين جنازه تشبعوا فيها لطم ليه
هو اللي هيقول رأيه هيتكرم عليه
بكفياكوا صدعتونا

ايه ياجدعان
كله بيخبط في كله وعمال بيهري
واللي فاهم واللي مش فاهم بيفتي
ربنا يلطف بخلقه وحالنا يهدي
ولجل ربنا تعتقونا
ايه ياجدعان

كل يوم واجعين دماغنا
بحوارات تشغل فراغنا
احنا فينا اللي مكفينا
مش مستحملين حد يزغزغنا

كل يوم قاعدين نحلق
ع اللي فركش واللي طلق
هما من بقيت عيلتنا
عشان نشير او نعلق

كل يوم افلام وهيصه
ودوشه وتريندات رخيصه
احنا جالنا صداع كفايه
حسوا خليكوا ناس حسيسه

كله بقي علي راسه ريشه
تعبنا بقي مبقتش عيشه
أفصلوا شويه الكلام
بعد أذنكوا شدوا فيشه

انتوا ايه فاضيين ياساده
ولا الفراغ زايد زياده
لو مفيش حاجه تعملوها
قضوا وقتكوا ف العباده