كلمات الليلة المنكوبه

‏لي ثمان سنين كأني عايش بغيبوبة
وا حسافة يا ثمان ضاعت من سنيني
كلها من بعد فرقا الجادل الرعبوبة
شيخةٍ ميلادها ثلاثة وتسعيني
من سببها خاطري له وقت دوبه، دوبه
مختلف رغم اختلاف الوقت والروتيني
إترك اللي سامرين ونارهم مشبوبة
نقوة أصحابٍ عن السر الخفي داريني

كلما قالوا لي الريم العفر مخطوبة
قلت وابوكم على قلبي ودمعة عيني
انحر الفج الوسيع اللي وساع دروبه
ولا تناسى لين اسوي قافٍ يسليني
فيك يا اللي وصفها كامل صفر عذروبه
شبه وضحى فارقه في نخبة العشريني
عشت معها أحلى مراحل عمري المكتوبه
و وادعتني بعد ستة وست في الألفيني

ماني بناسي هجاد الليله المنكوبة
الأحد في إثنين سبعة ليلة الإثنيني
الأنوثة بعد هاذيك اللعوب اكذوبة
لو بستبدل هواها ما أحدٍ يغريني
لامشت تحسب خطاها كأنها مغصوبة
وزنها من خمسة وخمسين للستيني
يمها الأفواه تنطق ويش ها الأعجوبة
طولها فوق المتر ثابت على السبعيني

اتبختر كأنها قصيدة مطلوبة
وتغلا مثل طفل في كنف جديني
كأنها قافٍ هل الإبداع ما غنوا به
فارق التركيب والمضمون والتلحيني
عينهْا على عيون العاشقين اعقوبه
وعودْها فيه النعومة والترف والليني
من حمْار خدودها يطري عليّ مضروبه
ومن سواد عيونها يطري عليّ ترثيني

خصرها مقاس خصر الدله المربوبة
وفوقه مرايا عليها حطّ فنجاليني
القصايد في الغزل لأوصافها منسوبة
شي واقع لاهو بصدفه ولاتخميني
روحت ثمان مالي عن هواها توبة
عايش ما بين هاتيني وبين اخذيني
كل عشاق الزمان حقوقهم مسلوبة
وخايفٍ ما جاء الدجيما في الغرام ايِجيني