كلمات الجمال المثير

رحت أنا في جو غايم المسا وقت العصير
السحِب فيه إتّراكم والنسايم تلفحه

ليتني من قبل أروّح في مراحي مستخير
أو حصل لي صدةٍ قبل أشوفه وألمَحه

لي وقع قلبي بحبه مثلما الطير الصغير
لا معه ريشٍ يشلّه لا ولا فيه أجنحه

رحت أنا في جو غايم المسا وقت العصير
السحِب فيه إتّراكم والنسايم تلفحه

فيه من لفتة غزال وفيه من هيبة أمير
وفيه من فتنة شجاعٍ منتصر في المذبحه

إن طلبت القرب منّه خفت من شيٍ يصير
سل سيفه من عيونه وأنا في إيدي مسبحه

طيش مغرور بجماله في الهوى توّه غرير
لو لعب بإحساس قلبي مالي إلّا أسمَحه

رحت أنا في جو غايم المسا وقت العصير
السحِب فيه إتّراكم والنسايم تلفحه

أتودد له وأحاول وأتقرب وأستجير
يا عساه يلين قلبه في المودة وأربحه

الجمال إللي يشله غالي وقدره كبير
حق ندراه بمشاعر ولا نحاول نجرحه

وانا لي شفت المحاسن والجمال إللي مثير
تنكسر قوة طموحي وله عيوني تفضحه

رحت أنا في جو غايم المسا وقت العصير
السحِب فيه إتّراكم والنسايم تلفحه