كلمات ترجل فارس احلامي Taragal Fares Ahlami

يقولون البكا حسرة ولا يرجع بكاك احباب
وصبرك يمسح العبرة وين الصبر يغمرني
ابشكي والعذاب اللي بحلقي ما لقاله باب
انا اللي بدمعتي غصيت انا الحرمان كاسرني
وش ايامي بلا روح الحبيب وطيفه الجذاب
وش الفرحة بلا قربه بلا نبضٍ يسامرني
ترجّل فارس احلامي خذا معه النهار وغاب
الا يا شقوتي عقبه الا ياربي صبرني
يقولون السهر ماهو لعيني والكتاب كتاب
رضيت بحكمته ربي وغلا نايف مسهرني
ابسهر والبس ثياب الحداد وبشعل المحراب
وابدعي لاخر العتمات لين الصبح يجهرني
الهي يا الهي يا عليمٍ ما عليك حجاب
ابمسح جبهتي بتراب مكة وانت خابرني
وليفي صار ضيفك يالكريم الغافر الوهاب
شديدٍ جاك ياربي تهنيه وتصبرني
يقولون النبي قبله توفى وللرحيل اسباب
قبلتك يالعزا لكن هجوس البعد تجبرني
غشاني الحزن يا ربعي ذبحني بالي الكذاب
عذرت الناس من حولي وابي مخلوق يعذرني
وانا لو تفتحو صدري تشوفو للهموم انياب
تعض عروق ذبّلها الحنين وآه تقهرني
فمان الله يا نايف مكانك وسط ذا الاهداب
نظر عين المها تبقى وذكرى ما تبادرني