كلمات تصبحي على خير

الليلة اتذكّرت الوعد اللي وعدتك بيه
وعرفت اني غلطت ف حقك
تزعلي مني ده عادي ووارد
انما تبعدي .. لأ مش حقك
نزعل على حاجه ده عادي وبين كل العشاق
انما يوصل بيننا الموضوع لخصام وفراق!
انا مش قابل
اطلع من حضنك وامشي لفين ؟
القمح مالوش هجر سنابل
وانا واعدك اني هاصون عهدك
وهلازم دارك وهاموت فيه
والأرض اللي انا فيها بلادك
والدرب اللي قصادك هامشيه
وان كانت أيامنا معانده
فافضلي على روح راجلك سانده
وكفاية خصام
السكة اللي بدونك ورطة
والضحكه بدونك تبقى حرام
والليل اللي مالوش صوتك ساكنه
يتحرّم على قلبي مساكنه
والوطن اللي انتي بعيد عنه
تهجرني بيوته وأماكنه
فافهمي اني مافيش عندي بعاد
وهصالحك وانتي مخاصماني وعناد بعناد
يا شروق آيامي ونور عيني وقلبي المليان
يابيوتي وعفشي وضلايتي وكل السكان
وأماني واحساسي بإني لسّاني بخير
تصبحي علي خير

تصبحي على نفسك لقياها
من غير ولا حزن ولا متاهه
بتبصي لبكره بعين حره
ومصره تداوي جراح ماطابتش
مش فاكره الحدوته المُرة
عن واحدة تحب وماتحبتش
ومذاكرة التفاصيل الكامله
لحاجات دومتيلها لكن مادامتش
تصبحي على شمس ف شخصيتك
مجنونه وهادية ومتفائله
من غير ولا رفض ولا مساءله
من غير مايبصوا ف تدوينك
تصبحي مش لاقيه اللي يدينك
علشان ليكي قلب وماشيه وراه
واهو قلبك شاف احزان ياما
مين زيك لقى حزن اتخطاه
الله ياجميل خلقك واحنا
لو شوفنا جميل بنقول الله
وان شوفتك ما املكش الا اقول
ان انا يشغلني اكون ضهرك
افتحلك عيني لزوم سهرك
وافتحلك قلبي مساحة سير
تصبحي على خير

وحشاني ووخداني الغُربه وحرماني وصال
وهاقولِك إيه قد اللي اتقال ؟
وأكيد مهما كلامي اتلوّن
واخترت اللي يوصل ألمي
فيه حاجات حاسس بيها
ومش هاعرف ادوّنها بقلمي
زي غيابِك
زي ان مابيني وبينِك طيران
وبحور وغيطان
ومسافة السكة اللي مابيننا
مش قد السكة اللي مابيننا
بس اعمل ايه
ما انتي واصلِّك غرضي من القول
البوح خوّان
واللي أنا ليا ليالي بحوّش ف كلامه عشان يتقال
اتبخّر اول ماكتبت ازيِّك
ف ازيّك
يمكن تضيّق المسافات بعديها
وازّيك
يمكن يتغيّر شيء ف الحاصل ونقرّب
وازيِّك
وانتي بعيدة
وانا متغرّب
توصلني آلامك في غيابي
زي ماتوصلني سعادتكِك وانتي معايا
انما علشان بكره تقولي
الراجل ده
عمره مابطّل يدفع أتمان
وعشان وانتي لحالك في الليل
يرتاح قلبك للشخص اللي انتي راهنتي عليه
وتحسّي أمان ف عنيه
وتقولي تمام
تبقي على يقين ان انا درعِك
في الحرب الدايره مع الأيام
وبإني الخطوة الممدودة ف أحلك مشاوير
تصبحي على خير

تصبحي على نفسك مرضيه
متفائلة وطيبه وقويه وكسرك مجبور
تصبحي من عالم فيه عتمه لعالم فيه نور
انا اسف على اخر مشهد
ومكانش ف بالي انه هيحصل كل ده بيننا
وانت ف عيني الزاد والزواد وانتي المنّه
وانتي الفرصه اللي أخدها شيطان يدخل جنه
أنا مش زعلان منك بالعكس
انا عارف وجعك ومقدّر
ومسامحك على كل التجريح
عارفك انك عود فل رقيق
ماعرفش يقاوم سطوة ريح
برضه اللي حصلك مش عادي
واللي قابلتيه ما يفوتش بدون مايسيب أثره
فرعين ماشيين ف طريق غير بعض
أحسن من فرعين اتكسروا
احنا الاتنين كنا ضحايا
لظروف بتدور فينا رحايا
من غيرك لكن جوايا
احسن من جنبي وبرّايا
وكلام الشعر ان كان موزون
عمره مابيهوّن ويطيّب
بس انا مش عندي سلاح غيره
اتصرف يعني ازاي طيب
فيه حاجات مايحسش يوجعها
الا اللي عايشها وجرّبها
والست ان بانت كله تمام
فبيبقي على حساب أعصابها
فيه حاجات بتموّت أقربها
سكاكين الليل لما تواجهك
وتسيبك ليك ف غابات تفكير
تصبحي على خير