كلمات نَفس الحيطان

[الكوبليه الأول]
أنا تايه جوا نفسي ومش لاقيلي طريق
كل يوم بصحى مضايق، ومش فاهم ليه "مضيق"
الكلّ بيقولي "عادي"، بس أنا شايفها تضييق
بقابل ناس كتير، بس مفيش فيهم صديق
[اللازمة]
ما تقوليش "قوم"، أنا واقع من زمان
بتضحك؟ طب تعالى شوف جوا المكان
المكان ده قلبي، فيه كركبة وسرحان
ومهما أحاول أهرب، برجع لنفس الحيطان
[الكوبليه التاني]
كل سؤال من اللي حواليا بيزود همّي
"مالك؟ مليش شكلك تعبان؟ لا عادي" وأنا بضحك كإني ناسي
بس جوايا فيلم طويل، مش بينتهي
وكل مشهد فيه بيكلّموني بصوت قاسي
[اللازمة تاني]
ما تقوليش "قوم"، أنا واقع من زمان
بتضحك؟ طب تعالى شوف جوا المكان
المكان ده قلبي، فيه كركبة وسرحان
ومهما أحاول أهرب، برجع لنفس الحيطان
[الكوبليه]
جوايا صوت بيصرخ ومحدّش سامع
كلّهم شايفيني تمام، بس وربي أنا واقع
ضحكتي زي القناع، والقلق فـ قلبي مزروع
بحاول أبان قوي، بس ضعفي علي وشي مطبوع
[اللازمة]
ما تقولوليش "عديها"، دي النار مش سايبه
الليل بيزود همّي، والنهار ده كدبه
لو قولت كفايه، هيقولولك غلّاب
و لما اقول "عديتها" هيقولو "انتا كداب"
[الانفجار]
كفاية بقى! وربي زهقت من كتر الكتمان
صوتي جوّا دماغي و بيزعقلي ف كل أوان
حاسس إني بين نارين، والوَسَط ده دخان
و انا لو ما انفجرتش، هضيع من كتر التوهان
و انا إيه ذنبي أعيش بوشّين؟!
وشّ بيضحك، ووشّ تاني مليان أنين
بمثل؟ آه بمثل! بس التمثيل مش ف كل حين
أنا اتولدت طيب، بس الدنيا خلتني سجين
[نهاية الانفجار]
مش ضعيف... بس التعب خلاني ساكت
ومش بكّابر، بس مين هيسمعني لو ناديت؟
أنا مش وحش، بس الوحدة خدعتني ع البارد
صرختي مش للناس، صرختي لربي فـ سجودي وبكيت
[الختام]
بس يمكن بكرا حاجه تتغير فـ السكة
يمكن كلمة من حدّ تطلعني من الخنقة
أنا مش طالب كتير، بس نفسي ف اللمّة
ونفس السلام اللي بكتبه… ألاقيه جوّا القلب لمّا
هكمّل، حتى لو الدنيا لسه تقيلة
حتى لو الطريق كله جبال طويلة
لو وقعت، هقوم، ومش لوحدي في الليلة
فيه رب فوق، عارف اللي ف قلبي
وسامعني ف كل ليله
يا رب ليله جميله