كلمات يا اهلا بالمعارك

با اهلا بالمعارك
يا بخت مين يشارك
بنارها نستبارك
و نطلع منصورين
ملايين الشعب تدق الكعب
تقول كلنا جاهزين
خارج ساعة الصبحية
و الناس رايحين جايين
نظرتهم فكرتني
بايام ستة و خمسين
راجع فى المغربية
شفت عيون الثوار
نظرتهم فكرتني
بالضباط الاحرار
شفت اجتماع سياسي
كلماته نغم حماسي
و لا فيش على قده كراسي
من كتر ما فيه ملايين
و ف لحظة نطل و يهدا الكل
و نسمع فرحانين
عبد الناصر حبيبنا
قايم بينا يخاطبنا
نجاوبه و يجاوبنا
قائد و مجندين
" قول ما بدالك
احنا رجالك
و دراعك اليمين
عبد الناصر يقول
" الله اكبر و يوم الازهر فى وجداني
يا شعب قمنا لقهر الصعب من تاني
وعود معنديش مفيش الا النضال عندي
و شقا و معارك مريرة كتير يا اخواني "
" اطلب تلاقي تلاتين مليون فدائي
فى جميع الميادين "
عبد الناصر يقول
" على كل باب فى الميثاق مصباح يهدينا
يشوف جهادنا العظيم على فين مودينا
للافراح و الرفاهية ح نمد طريق ع النيل
اسمه فى الاشتراكية التصنيع التقيل
بس نضاعف انتاجنا اضعاف اضعاف اضعاف
و ندبر مهما احتاجنا و نحارب الاسراف
و بقرش الادخار نتحدى الاستعمار
و نقيم جدار جبار يحمي حياة العاملين
ادي نقطة بنقطة جميع الخطة
و بالله نستعين
خطتنا خلاص فى ايدنا و خلاص متشمرين
و حزين ياللي تعاندنا بتعاند جبارين
جبل الجرانيت انشق انشال
و ف بحر النيل انزق امال
ما فى حاجة تقولنا لا ايش حال
يوم تحريرنا فلسطين
و التوبة التوبة التوبة نصبر على غدارين
وحياة الدم الغالي وحياة عرق الجبين
توبة ماعاد فيها مجاملة خلاص
و لا عاد م الثورة الشاملة مناص
يا ايدينا العاملة ازرعي اخلاص
واحصدي و الرب يعين
احصدي و انقضي اكشفي و ارفضي
خاينين و انتهازيين
ح نشق طريقنا بنور مبادئنا
و لنا النصر المبين
و يا اهلا بالمعارك
يا بحر الثورة يا هادر خلي هديرك بنظام
من صوت المكن الداير عين العدو مش هتنام
و انت يا شبابنا اتقدم جه دورك فى التاريخ
بايديك لازم تتقدم مصر فى عهد الصواريخ
و شبابنا نهض يا حبايب قال جه دوري مانيش هايب
يسلملي الشعر الشايب و الناس المخلصين
للمخلصين الف سلام
الاشتراكيين الف سلام
الحقيقيين الف سلام
لجمال و اخوانه الف سلام
يحيا لاوطانه بالف سلام
و انا و انت و هو بخير و سلام
و سلام مننا لمنى قلبنا
للوحدة الكبرى
و نعيش و نضالنا يحققها لنا
و نقول كلنا جاهزين
و يا اهلا بالمعارك