كلمات مرثية ( الام )

والله لولا الخوف من ربي و كرهي للذنوب
كان اقول ان التراب ابعد عليك من النجوم
يا الهي تطمئن بذكرك ارواح و قلوب
لا اله الا انت نسجد له لا غيره يدوم
يا العظيم الي في علمك جنه و نار و غيوب
تنجي امي من عذاب النار و القبر الكتوم
يمه الله اللي اعلم يوم اودعك مغصوب
يوم احطك في القبر ما ادري اقوم او ما اقوم

ما هقيت امشي ولا خطوه ولا الحق غروب
من عرفت ان الفراق اليوم صار امر محسوم
صارت الدنيا تدور ولا عرفت الدرب نووب
مثل الاعمى صرت يمه ما علي بشرهه ونوم
الوكاد اني غديت بصوب والدنيا في صوب
والحياه الله يجيرك صارت اقسى من اللزوم
كل ما اذكرك يمه ينحرق شمع ويذوب
يختنق صدر المفارق كثر ما صار محروم

اذكرك وانت هنا وهناك يا صعب الهروب
وين ما اناظر اشوفك في عيوني كل يوم
اتخيل طلتك ومشيتك في هالدروب
حتى صوتك اسمعه نفس السوالف يا رحوم
صار بيتي في عيوني موحش وكله عيوب
من رحلتي لا خبر لا علم ولا عين تنوم
ما بقى للبيت نور وما بقى للجرح ثوب
لا بقى الا ذكريات بيني وبينك تدوم

يمه الله لا يعاقبني ولكني اتوب
ليت ربي ما خلق فرقى ولا موت وهموم
ادري الجنه تحت رجليك ولله الوجوب
اسال الله الرضا والفوز يالحي القيوم
والله لولا الخوف من ربي وكرهي للذنوب
كان اقول ان التراب ابعد عليك من النجوم
يا الهي تطمئن بذكرك ارواح وقلوب
لا اله الا انت نسجد له ولا غيره يدوم