كلمات الكلمة بتقتل A Word Could Kill

مجتمع مليان عمالقة في اذية النفوس
عندهم قوى خارقة في جعل الانسان منبوذ
بكلامهم وافعالهم بيخلوا حياتك كابوس
بيعلموك دروس يا تنعزل يا تعيش تدوس
واحد ماشي في امان الله وواحد تاني كل هواه
يتقال عليه ابو دم خفيف وسط صحابه اللي معاه
يعمل ايه يرمي افيه يخلي الناس تضحك عليه
ودا كله ليه بس عشان يرضي النقص اللي جواه
وفي اللي تخلي بنت معدية تختارها تكون ضحية
تتريق على شكل وجسم ولبس وحالتها المادية
واللي بيحلم يجوا عليه .. يتريقوا .. يستهزئوا
متكملش .. متحاولش حلمك عمرك ما هتحققه
كله في كفة والتنمر على الفيس بوك في كفة
تريقة وسف على الناس زي ما نكون في زفة
كله بيهيص راكبه ابليس مفيش تمييز
والحقيقة ان الضحايا على تكاية وينطوا من الحافة

الكلمة اللي بترموها بتشغلنا وتأثر فينا
مش مدركين معانيها وانها قادرة تطفينا
كلامكم زي اسهم كلها مليانة سموم
سمها بيسري ويقتلنا الف مرة في اليوم

اما الضحايا .. بيقفوا قدام المراية
بيصبهم وسواس من الفاظ من ناس هراية رغاية
يبدأوا يقتنعوا بانهم وحشين .. فاشلين
وليه اصلا عايشين .. وفي ثانية تتقلب الاية
جزء منهم يمارس اللي اتمارس عليه
يبدأ يأفي ويسخف على كل اللي حواليه
يبدأ يجرح بكلام .. كلام يبني اوهام
يدوس لاجل النفوذ يزيد ويداري على الالام
اما الجزء التاني فضل عدم الاستمرار
في اوضته انعزل .. اتقتل من قولة دا هزار
عرف الاكتئاب ودخله من اوسع ابواب
بتراوضه افكار بتحرضه على الانتحار
اللي نفسي تفهموه كل شخص في حالة حرب
بدل ما تتنمروا ساعدوه يقف في الحرب صلب
واعرفوا ان الكلمة بتقتل زي الضغط ع الزناد
متخلقوش متنمرين ومكتئبين جداد

بنعافر في الحياة متحملين طعناتها
وكتير مننا مستحملش واترمى في ساحاتها
مطالبنا مش كتيرة مطالبنا تسيبونا في حالنا
متجوش بكلمة تزودوها وتقتل .. احلامنا