كلمات للشمس
للشمس من بعد الغياب طلوع
والليل ظا يطولش بينا ظلامو
يا حلم عايش ما عرف ممنوع
لازم يجيه الصبح وتضوى ايامو
مازال عندي حب بيه انعيش
وجوانحي مازال فيهم ريش
فوق السحاب انطير ما انوطيش
مادام عندي قلب ينبض حي
فيا العيون الحالمه بالنور
ما انخاف م ليام كان ادور
ما يهمني لوكان عالي السور
لازم عيوني اتشوف يوم الضي
ديمه الامل في قلوبنا موجود
لايوم سلم ما عرف حدود
احنا ولاد العز ولا الجود
بالعزم ما يصعب علي شي
انحب الحياه انغني بعالي الصوت
ما انخلي لحظه فرح منا تفوت
ورد المحبه فايدنا ما يموت
من حبنا نرويه كل شوي