كلمات حلال الامور الثقيله

امسيت اسامر هاجسي تالي الليل
واترك هزيل الشعر واكتب جزيله
واجتاح شعري حاجز الهم والويل
الذكر طيب والمعاني جليله

سجيت فكري في زحول الرجاجيل
افعالهم تشهد سنين طويله
خصيت سيف من سيوف مصاقيل
اولاد وايل كاسبين النفيله

خليفه بن احمد حفيد الحلاحيل
قرم فرق فعله عن رجال جيله
من حنكته يلقى الصعايب تساهيل
قايدنا حلال الامور الثقيله

لله درك يا سليل الفطاحيل
ياللي فعولك عدلت كل ميله
وقفاتكم تشفي الصدور المغاليل
وتحرق قلوب اهل الفعول الهزيله

اهل الفتن افعالهم كذب وتمثيل
خاب المعادي والخساره ثقيله
يالله تسود وجه قوم مسافيل
يالله تجازي كل نفس رذيله

يارب تبعد عن بلدنا الغرابيل
يالخالق اللي بالدعا نلتجي له
العمر فاني والمنايا مقابيل
الامن غايه والتكاتف وسيله

قولوا له البحرين صعبه المناويل
وحكم الخليفه مانخلق من يزيله
وصلاه ربي عد مزن هماليل
يبقى كلام الحق ذكره فضيله