كلمات يا هل المملكة

يا هل المملكه مني عليكم سلام
لوح القلب بالتسليم قبل الكفوف
من ثرى الجوف الى نجران مني سلام
ومن رصيف البحر الاحمر الين الهفوف
يطوي الخايع المقفار طي الخيام
ويسحب الذيل مثل العيطموس العيوف
حامي كنه سيف في نهار العسام
وحالي كنه ترحيب البدو بالضيوف

كلما رفرف الاخضر يعم السلام
والسحايب تصب الما وتضحك هنوف
اشهد انه على القمه ف راس السنام
السلاطين من قدره تحيي وقوف
تل قلبي ليا رفرف عليه الحسام
المشاعر تدق الروح دق الدفوف
وتدبك الخيل في سمعي ويشرق عتام
من شموخ يشوف الشمس تحت الكتوف

ليتني في عوالي نجد ريشه حمام
وليتني نسمه ف وادي حنيفه تطوف
لا تذكرت لي فيها خوال وعمام
يا صروف الدهر ما عاد اشوفك صروف
ويا جبال الجنوب اللي تشق الغمام
بلغي مهجه الغيمه تحن وتروف
ارسليها على قوم الحجاز الكرام
للحجازي على كل الشعوب معروف

ناشدي عن هل العوجا يطول الكلام
انشد الخيل عنهم والقنا والسيوف
الله اللي جعلهم للبلايا كعام
ومن قديم الليالي مزبن للضعوف
من تعزوا بهم في ذمتي ما يضام
عام تسعين يغني عن كثير الحلوف
يا هل المملكه مافي غلاكم ملام
جعل عينن ما تعشق شوفكم ما تشوف