كلمات لسه حلوه
يا امي
كل عيد وانتي
لسه حلوه زي ماانتي
صبيه لسه ف العشرينات
كل عيد ياحلوه وانتي احلي من كل اللي فات
ل امي صباح الورد ياريحه الورد
واول ارض بسكنها.. ويطرح فيا بستانها
ياست الكل اللي علشانها
شمس النهار تطلع
سعيد يامي وانا بركع وأبوس رجلك
اجمل سنين العمر كان حجرك
سريري ومأمني وحالي
اطهر من يقول مالي
واحس براحه وانا بحكي
ف حضنك بلقا انا راحتي
ياضحكه لسه ع ضحكي
وباكيه ل تكشيرتي
يااول دوله اروحها بدون
ماتسال اين تأشيرتي
اميرتي الأولي
والصاحبه م وانا ف اولى
لحد الان
ياول دليل قطعي أن انا انسان
امان الدنيا ف عيونك
امانه الله امانه الله تبوسهالي
بنجح ف الحياه وبقول
السر أن امي دعيالي
وإن زاد الحمل عن شيلي
قول ياست الكل ف ايدك حل
لكل همومي فادعيلي
تقوله يارب يرد مجاب
كأن السما عشانها بدون ابواب
٢١ مارس بس
ازاي .. والسنه كلها امي
غير الناس ماشيه ف دمي
مجرى الدم ف شرياني
انا مش محتاج لميعاد وتاريخ
علشان ابروزلك وحشاني
هدية ايه اللي هتنفع
اذا كان العربيد يعني مفلس
مستغني عن العمر وراح ابيعه
قصاد ساعه ف حضنك بتونس
ايه يعني معنس
وانا يعني لقيت حد شابها وماقبلتوش
الباقي يامي ما يتعزوش
ولا يسوى ف رجلك ضافر
يرضيكي اعيش ف الجنه
واموت كافر
ل امي كل عيد وانتي
لسه حلو زي ماانتي