كلمات مهرجان سهلة

وقت المحبة خلص خلاص وكله على حقيقته ظهر
أصل أنا بيتي مش إزاز فا مستحيل إني أتكسر
شوفتكم مني بس كان العيب بجد على النظر
ولما شوفت أنا الحقيقة طلعتوا ثعابين مش بشر
هي، هي، هي زيزو المايسترو

مش فارقه مين سالك لي ولا مين حابب لي شر
وريتكم ياما خيري وإنتم وريتوني مر
والله ناس ذئيبة أفعالكم دي غريبة
وقت الهزار صفار وإنتم ما تتأمنوش في سر

كم باكو ع اللي باعوا بكرة يرجعه بدموع
أندال ومش بيراعوا يعنى ممنوع الرجوع
فكرتوا تكلموني قفلت تليفوني
ممنوع تتصلوا ثاني دي نهاية الموضوع

صحابي أيوة جمبي في الصور والفيديوهات
السلفي اللي جمعنا بس من غير مكالمات
المصلحة بعيد قالوا مافيش رصيد
لكن لو في مصالح يتكلموا بالساعات

سهلة، سهلة مش فارقه اللي يغور، يغور
سهلة، سهلة واقف على الباب غيركم طابور
سهلة، سهلة مافيش ما بينا ثاني شات
سهلة، سهلة واطلعوا برة من سكات

مكسبي إني خسرتكم وهبعكم أنا بسعر التراب
غلطانة ما أنا قدرتكم وشوفت منكم العذاب
عملت قيمة لناس رخاص ما كنوش بيّ بيحلموا
بس أنا واثقة إنهم هيلفو يلفو ويندموا
عينيكم راشقة فيّ وإنتم بيّ مشغولين
طب ليه عاملين حبايبي وإنتم ليّ مخططين
ما تسلكوا النفوس مبدأكم الفلوس
أنا كنت في كابوس وفوقت منه يا غدارين

الحب عملة صعبة مش ماشية مع الصحاب
فاكرينها بجد لعبة وقت الجد في انسحاب
ما كفاية بجد غل والله ماليكم حل
أفعالكم دي تشل بس هيجمع الحساب

سهلة، سهلة مش فارقه اللي يغور، يغور
سهلة، سهلة واقف على الباب غيركم طابور
سهلة، سهلة مافيش ما بينا ثاني شات
سهلة، سهلة واطلعوا برة من سكات