كلمات يا شعبي حبيبي
يا شعبي حبيبي
يا روحي يا بيبي
يا حاطك في جيبي
يا بن الحلال
يا شعبي يا شاطر
يا جابر خواطر
يا ساكن مقابر
وصابر وعال
يا واكل سمومك
يا بايع هدومك
وحامل همومك
وشايل جبال
يا شعبي اللي نايم
وسارح وهايم
وفي الفقر عايم
وحاله ده حال
احبك محشش
مفرفش مطنش
ودايخ مدروخ
وأخر انسطال
احبك مكبر
دماغك مخدر
ممشي أمورك
كده باتكال
وأحب اللي شايف
وعارف وخايف
وبالع لسانه
وكاتم ما قال
لكن لو تفكر
تخطط تقرر
تشغل لي مخك
وتفتح جدال
ساعتها حجيبك
لا يمكن اسيبك
وراح تبقى عبرة
وتصبح مثال
وتلبس قضية
وتصبح رزية
وباقي حياتك
تعيش في انعزال