كلمات الدنيا مش ماشية ع الهوى والكيف
الدنيا مش ماشية ع الهوى والكيف
وانت اللي ماشي توزع ال 'معلش'
الفرحة بتعدي عليك تخاطيف
والحظ مش نافع وسط ناس بتغش
تفتح دراعاتك للحياة وتسعى
وتدوق مرارها لاجل طعم القرش
تنعس م الشقى عيونك الواسعة
فتنام بجسمك والدماغ متنامش
مسنود بكتفك ع الكترة واللمة
ب يطمنك صوت الزحام والوَش
وإن هَم بيك غدر الزمن هَمة
تلقى اللي ساندينك رجال م القش
شايف في نفسك خليفة وزناتي
وإن الهلايل لو يجوك متخافش
يجي عليك الضيق بفرسه وينادي
والضيق يعادل الف سبع ووحش
العمر زي القطر .. القدر بيسوقه
وكل ما أتمنيت فاتك ومستناكش
ربيع شبابك شهد.. قبل ما تدوقه
باعوا في ازايز اللتر منه ب قرش
والناس في الدنيا هما بس نوعين
واحد لأي شيء اتمنع ممنعش
وباس أيادي أسياده والرجلين
والتاني شبهك نص عمره ماعش
كل اللي زيك عاش ب بال رايق
شافت عيونه اللي غيره مشافش
الكون ده مخلوق وكلنا خلايق
تنام عيونا تملي واللي خلقنا منامش
فارمي حمولك وارضى ب المقسوم
وبوس ايدينك يابني ضهر ووش
الدنيا لو تجافيك لابد تيجي ف يوم
لو شافتك راضي تهدي إليك 'معلش'