كلمات أسف
ليه لما بتبصيلي
بحس اني اناني
الشعور دة بيخليني
عايز ابقى شخص تاني
ليه مش بتسمعيني
لما اجي اراضيكي
ليه بتحسسيني
اني الخيبة اللي بترازيكي
ليه بشوف ف عينك
نظرة بتخليني اعاني
ليه ديما تشاوري
على الحاجة اللي وجعاني
وكل حاجة نقصاني
يما مش ب ايدي
من 2019
كوابيس لازقة ف سريري
لو بعيوبي تقبليني
او فكرتي تفهميني
تفهمي اني عايز اجيلك
وانا جايب الكون فكيس
انتي اللي ربيتيني
وانتي اللي فهمتيني
اني مميز عن العالم
ليه دلوقتي بتلوميني
طلعت غير م اتمنيتيني
هي دي الحياة
انا وانتي ذي بعض
مخدناش اللي عوزناه
مش ضروري امشي الطريق
اللي انتي كنتي رسماه
مش عايز اكون غريب
يما عايز اكون انسان
يما مشيت ف الف سكة
حتى الجزمة تشهد
لما اتقطعت ف الطريق
انا اتعورت بس مشيتها
الدموع مبتهديش
لسة تايه في الطريق
لسة بعيد عنكم يماما
فرحلة بحث عن الدليل
مش كل حلم يبقى عيب علشان مجنون
مش كل خسارة يبقى ضايع او مهزوم
انا بلعن ف السكوت وأهرب م الهروب
انا لو اكلت السم اكيد مقصدش اموت مسموم
من ساعة ما كبرت
مخدناش مع بعض صورة
بكرا هبقى حاجة كبيرة
تخليكي فخورة
شوفت احترام م الفانز
والناس المشهورة
بس انتي رأيك اهم
نفسي اشوفك مبهورة
مش عايز اشوف الرضا ف عينك
وانا فوق ف السما
كان نفسي تشوفي النور ف عيني
متقتليش الامل
طول عمرك جميلة
طول عمري عنيد
اكيد انتي عارفة
انا طالع عنيد لمين
طول عمري بركان
نفسي يحضن جليد
اسف ع اللي قولته
بس دة اللي حاسس بيه
ليه لما بتبصيلي
بحس اني اناني
الشعور دة بيخليني
عايز ابقى شخص تاني
ليه مش بتسمعيني
لما اجي اراضيكي
ليه بتحسسيني
اني الخيبة اللي بترازيكي