كلمات فمان الله Fman Allah

يا مملوح الكلام اللي بصدرك في العيون اقراه
اشوف البعد في وجهك خذا رسمه وتلوينه
اعرف الساكت اللي نظرة عيونه تقول حكاه
يرد لسانه من البوح لكن تفضحه عينه

حبيبي دامك معزم على الفرقى فمان الله
عسى الله ما يعرّض خطوتك للعرضه الشينه
واذا خوفك على اللي وسط صدري خلني وانساه
عليه الله وأمانه من عيون الحسد ويدينه

اصون السر يوم يلوذ في وجهي ويشرب ماه
عليه اقبض بكفي كني القابض على دينه

امان المستريب الداجي اللي غايبه قمراه
ولو كانت مصابيح السماء في جيدها زينة
مغاليق الصدور يحصل الحاير بها منجاه
عليها من ظلام الليل حفظ علوم سارينه

هنا سرك في بيرٍ ناشفٍ دلوه على مسقاه
هذا أول بير لا يمكن يبل كبود راوينه
حبيبك لو يموت من الغبن مايعرفون اقصاه
ما تدري قلت له ولا نسى الموضوع من حينه

ضميره لو نشد عقله وش اللي فيه قال عفاه
لو يمينه تجسس في الحنايا يقطع يمينه

كريمٍ يعتق احزان الجميع وتزبن محياه
شجاعٍ تنتزع روحه ولا يعتق مساجينه
يموت السر في سور الضلوع ويندفن وياه
ولا يمكن يسولف فيه حتى بينه وبينه