كلمات احتري
احتري طلتك بدر في سمانا
واكتملت وصرت بدر في تمامه
واتحرى فرحة تروي ظمانا
وارتويت وفي صدى صوتي علامه
يوم أشوف الطير تشدو في حمانا
اسمعي يانجد وأصغي ياتهامه
احتري ليلتك طول العمر وانا
مثل من يرقى الجبل وانتم حزامه
إيه انا غنيت للدنيا واغني
والغنا في ليلتك يابدر حاله
في سنا بدر السما ماخاب ظني
واترنم واتنفس من خلاله
والقوافي تستميح العذر مني
والمعاني بين بدر وبين تاله
مرت الايام عجلا ما كأنّي
شفت قلبي طفل وأداعب ظلاله
يابني وعزوتي يانبض قلبي
كل يوم يزيد في دنياي نورك
اي وربي اي وربي اي وربي
في غيابك شوق واعتز بحضورك
اتونس في حياتي وانت جنبي
وانتهى دوري وصار الدور دورك
يامناي ويارجاي ونور دربي
ذا زمانك يالغلا والشور شورك