كلمات رسالة للشعب A message to the people
جاية اليلة مسي والافكار معبية راسي
جاية احكي كم كلمة بتمنى منك ماتقاطعني
تنيناتنا ولاد البلد وتنيناتنا عشنا حرب
تنيناتنا عشنا الظلم وتنيناتنا اكلنا الضرب
والحقد سكن جوانا وعشش جوى القلب
١٤ سنة حرب بالله ماحلنا نستوعب
انو كلنا ولاد البلد وبدنا نعيش فيها بتأخي
لا من حقي اني انفيك ولاانت بتقدر تنفيني
لازم نحاول نفهم بعض بدل ما نسفك بالدم
بكرا لما نصحى كلنا ماعد ينفعنا الندم
قلبت الدنيا عنا غابة وكل واحد صار بدو يحاسب
عم نتناقش بنفس الطاولة وكل واحد مسدس ساحب
نازلين حصاد بارواح بعض تحت مسمى الطايفة
بطلع جوى قلوب العالم كلو مخبي عنصرية
ياحسرة عليكي يابلادي صرتي مجرد بركة دم
والاراضي كلها نسقت بشلال دموع هالام
العالم حولي بتخونني لأني بحكي بالدم الواحد
صارو يشوفوني عميل وبنو حولي الف حد
المجرم بينقتل لإجرامو مو لدينو او طايفتو
واذا بدك تجي للواقع حتى طايفتو بريئة منو
بدل السلام اول سؤال فيك تحكيلي شو الطايفة
عهالاساس بحكم عنك ومافي داعي تعرفلي غاية
الاسد صدق وصل لغايتو وخلانا نكره بعضنا
دخل كالشيطان مابينا وزرع حقد جوى قلوبنا
ويلي الحقد عبى قلبو ماعد يقدر يشوف بعينو
صار اكبر هم جوى راسو كيف ممكن ياخذ تارو
جرب لحظة وقف استوعب حاج تظلم ناس بريئة
حاسب المجرم كفرد ماتحاسب بأسم الطايفة
صدق ماحد حيربح بهالدوامة يلي غرقنا فيا
بعد ماتفتح عيونك حتشوف انو كلنا خسرنا
رافض ينعاد نفس الماضي لان ماحد حيكون راضي
لحتى نعمر هي البلد لازم كلنا نشبك الايادي
وبدي وجه رسالة خاصة للفلول والمندسين
بكرا الدنيا حتدور وتدوقوا سمكم بإيدكن
حتوقعوا بشر افعالكم ماحتلاقو حد يشفعلكن
والشخص يلي بتدافعو عنو صدقو بالاساس باعكن
بدي وجه رسالة للشعب بتمنى شوي تحكموا عقولكم
جهود الحكومة مابتكفي اذا ماساندتوا بعضكم
هي البلد النا كلنا لازم نتكاتف نعمرها بايدنا
نشيل فكرة الطائيفية والمناطقية برا عقولنا
نتعايش مع بعضنا وماحدى يفرق بينا
مصير البلد انها تعمر بأيادي كل ولادها
بكافة اطيافها وناسها والمحبة حتسود المكان
وبالنهاية بدنا نتذكر السلام رسالة كل الاديان