كلمات لاحياه لمن تنادي

ساد غيم ولاح برق وطاح دمع وسال وادي
يا عيوني وش بقى من دمعك اللي تذرفينه

بين لا تبحث خفاك ولا حياة لمن تنادي
انقطع حبل الرجا المربوط في النفس الحزينة

لا نويت أسلى عن الحزن بطويلات المبادي
قامت الذكرى وراي تقول جعل الله يعينه

من كثر ما تضغط الدنيا عليّ وأقول عادي
صرت أواجه وقتي الغلّاب وأصافح يمينه

الهجر يقدر يسوّي ما تسوّيه الأعادي
والوصل يقدر يعَيّش صاحبه وضع السكينة

يا حفيدة متعبين الخيل مروين الهنادي
كل بيتٍ فيك يلبس له عن الأبيات زينة

لا تلوميني ليا من جيت لك كُلّي مفادي
من يشوفك مستعد يسوق لك عمره رهينة

في وصوفك يعجز لساني ولا يعجز فؤادي
يوصلك شعري من الأعماق كِنّك تخطفينه

أتعذّر كل ليلة بالشعور اللاإرادي
كِن ما ذا بالشعور اللي من أوّل تعرفينه

لا يهمّك لو يقولون البحر ما هو بهادي
المهم إنّ البحر ما طيّر شراع السفينة

اطلبيني كل شي إلّا التهاون في المبادي
من تهاون في المبادي يا عسى ربي يهينه

عاشقٍ غادي بحبّك والله إن ما هو بغادي
لو ورا حبّك يبيع العمر ويضيّع سنينه