كلمات الوجه الحياوي

يا غايبة كم لي من الشوق ملتاع
راحت بك الدنيا وطال انتظاري
أحن لك واشتاق وأكن الأوجاع
والحزن من عقبك رفيقً مباري

رحتي وأنا ابغى منك تلويحة وداع
ورمح الجفا بين المعاليق فاري
قطّع عروق القلب من بين الأضلاع
ما عاد ينفع به طبيب استشاري

يا حلوة الوجه الحياوي والأطباع
قربك نعيم الروح والبعد هاري
رمشك خجول وسودك الخدره وساع
ونهود صدرك كل نهد انتحاري

والخصر جايع لكن ردوفك شباع
ما أدري من الظالم ولا هو بداري
ليا مشت رجلك على يابس القاع
الغيم من فوقه يهل العباري

والورد ينبت فيه من كل الانواع
والطير يصدح لك غناه الكناري
مهرةً عقيدن صيتها في العرب شاع
وريميةً تلعب بروض الخباري

ولا عديمً صاده الشيخ فزاع
له مخلبً حده ثعى في الحباري
ما أنت بسلعة بين شاري وبياع
من ضامته صدتك شاف العزاري

متى تجين لسكرة الموت نزّاع
لو كان قلبي بالحزن منك ضاري
ما كنت أنا اللي للمقفين تباع
لكن تبعتك كأني اللي مثاري

لا ضاع قلبي في محبتك ماضاع
ما كان ملزم كان الامر اختياري
وأقول لا اقبلتي علي مرحبا الساع
عقب السهر والبهذلة والمساري

جوارحي تبغى وصالك بالإجماع
وإن نسنس النسناس جاب لك طاري
أدهشت لعيونك جماهير الإبداع
ما فيه بيتً فيك ما هو بناري

جوارحي تبغى وصالك بالإجماع
وإن نسنس النسناس جاب لك طاري
أدهشت لعيونك جماهير الإبداع
ما فيه بيتً فيك ما هو بناري