كلمات كل واحد

والشوارع مليانه ناس
كل واحد عنده قصه
كل واحد عنده هموم
كل واحد عنده فرصه
كل واحد نفسه يقوم
كل واحد بيحاول
والدنيا بتعاند
والقدر مش حابب
والنصيب دا غالب

كل واحد بيسعي
كله بيحاول في طريقه
فيه واحد عنده الاختيار
والتاني مجبر علي طريقه
في واحد عايش شبابه
والتاني مردوم بالتراب
الاول ناس كتيره جمبه
التاني القرايب اغراب
في واحد نفسه يبقا كويس
وجوا قلبه الطيبه
الالماني كان هيتغير
لوحبته حبيبه
في واحد الظروف اجبرته عالشمال
اصله حاول كتير واليمين مش شغال
نشكي لمين ياعمي نشكي لمين يخال
في دماغنا جوا مسجونين
والافكار الاشغال

جيلنا بيحاول يوصل
في كتير موهوبين
الضغوط قالبه حالهم
وم الهم مهمومين
فبيضطرو يضربو
وم الواقع هربانين
فبيضطرو يشربو
لحد مينسو هما مين
فبيتشكلو زي الصلصال
يتصرفو علي حسب البيئه
شباب شرانيه لكن نفوسهم برئيه
عمرهم ميسبوك لو في يوم وقعت في ديقه
عمرهم ميبعوك ايان كانت الغنيمه.

وانا مش بدافع عنهم
انا كنت هبقا منهم
بس اخترت نفسي
وقتي كله لحلمي
مش بحكي انا بخبي
في نار جوا قلبي