كلمات العز لأم القوي

يا مرحبا يا شريف و طول عمرك شريف
والله ما هو ناقصك مثقال ذرّة شرف

روّحت ثوبك نظيف و جيت ثوبك نظيف
حنّا نعرف انك ابيض وجه و ابيض ملف

جنبك لو نحط ضلع طويق يطلع خفيف
و يقول مافيه وجه مقارنة للأسف

أنتَ تحمّلت غارات الزمان العنيف
والضلع لو جاه ربع اللي عليك اختلف

صنعت الامجاد لو أنك على حد سيف
و أمجاد الأبطال ما تِصنع و هم في ترف

سياستك تحذف الأول مكان الوصيف
و تحقق أصعب بطولة ما تحقق هدف

العز لأم القوي و الدمع لأم الضعيف
لله درّ أمك اللي دمعها ما ذرف

دامك مضرَّى على الشدات تبكيك كيف؟
تعرفك رجّال ما ترجع مع أول ملف

يمناك مثل النخيل تجود فأحر صيف
الناس تلقى التمر منها و ظل السعف

لا زلت منصى القبايل لو فقدك المضيف
و أوحيته يقول بلسانه فقدت الشغف

ينصاك من كان في حاجه و حاله كسيف
ويروح لـ " الهم" و يقدّم له إخلاء طرف

(صنايعك )كلها ما هي (تصنّع) و زيف
حتى (محاسنك) ما جاتك (محاسن صدف)

و صدوف الايام ما منها اي شيٍ يخيف
تقدم لها الروس ما يقدم عليها طرف

لا تحسب إنَّا دحمناها بجنبٍ صخيف
ولّا انثنينا بعد شفنا الطريق انتصف

السيل لو ما يشوفه غايب ولا كفيف
يهدر و يدرون بأنَّه مندفع ما وقف

واللي يبي يضيف شي إضافته ما تضيف
(واو الجماعة) ختمناها بحرف (الالف)