كلمات يا بشر
يابشر تكفون حلو عن سمايه
مايصيب الهرج لو الهرج صوبي
كم سكت لكم بما فيه الكفايه
اشتموني لو زعلتو و اشمتو بي
عيبوني واتركوني في عمايه
واتركو لي واحدن يرضى عيوبي
اتركولي واحدن يمسح شقايه
كل ماحط الزمن دوبه و دوبي
اكتفي بك وارمي الدنيا ورايه
ياشروق العمر مدري ياغروبي
يابعد عمر الكتابه و القرايه
يالشمالي يابو الملح الجنوبي
اذكر انك كنت لي مثل الهوايه
لو تروح ولو تجي يبقى شحوبي
بس مدري كيف صرت اليوم غايه
وصرت اجي واروح مدري عن دروبي
حالف بالله ما اقطع بك رجايه
رح وبلغ ربعي اللي هبلو بي
قلهم يمكن يخلون الوشايه
وان تمادو خلهم مهما حكو بي
انت خلك بس في الدنيا عزايه
لا تفكر في العواذل وانت صوبي
ادري انه كل درب و له نهايه
بس انا باقي معك لاخر دروبي
كل ماقال الخطا ماهو خطايه
قلت له قل للعيون السود توبي
ضيعتني و اسال الله الهدايه
وين اجيب العقل اجيبه من جيوبي