كلمات معانق الاحلام

الليلة شموع
وبخور وهدايا
ومعانق الاحلام ومصافح النور
جاتني تزف الشمس
بين الثنايا
بنت السحاب وموعد الشوق ممطور

هيبة حضوره ونور
يروي ظمايا
هاج الظلام و ودع الليل مكسور
ريمية ما استوعبتها المرايا
حلم العيون وحسن طاغي ومغرور

حسيت بالخفاق بين الحلايا
ينثر مداهيله لها ورد وزهور
اشوف فيها شي غير البرايا
ملح ودلال وذوق واحساس وشعور

واهيم ما بين الحلا والحلايا
والكامل الله ما بها ذرة قصور
الله عطانيها كريم العطايا
شح النهار وصيرت نور في نور