كلمات بيدها | ثامر شبيب

الله وأكبر ياهذيك المواعيد *** أيام ما كانت تحاتي وعدها
من قبل لا تكثر عليها المناقيد *** وتلبس خطاياها عباه لجسدها
العام كانت حلم ليل الصناديد *** من الحيا ما تجاوب اللي نشدها
واليوم صارت تصنع لكيدها كيد *** تعلمت وشلون تتقن نكدها
تومي بيدها لواحدن واقف بعيد *** تحسبني أزعل يوم تومي بيدها !!!
ما تدري إن فراقها كنه العيد *** ماني بميت من غلاها بعدها
القلب لو شوقه بعد غابت يزيد *** ذبحت قلبي في يدي لو فقدها
ما عادها كفو السهر والتناهيد *** مدامها خانت مبادي عهدها
قولولها وإن كانها شيخة الغيد *** تستر عن عيون المناظر نهدها
وإن كان اصبح عذرها حب تجديد *** مع موظة يخذل مطرها رعدها
لا والله الا زادة حبارة الصيد *** وطيور ماهدة بيكثر هددها
العلم بين مايبي زود تأكيد *** واضح وضوح الشمس للي شهدها
الشمس تطلع شرق يوم الله يريد *** حكمه من الله ما طلعة من وحدها
الله أمرها تنور الكون تحديد *** وبعض البشر مع كل هذا تعبدها!!
يعني خلاصة هالحكي والتشاهيد *** قولولها من قبل تفقد رشدها
إن كانها مشتاقه لواحد بعيد *** تروح له .. ماهوب تومي بيدها!!