كلمات اكاديان وفيرونا
عاني لروما باعواني وفرساني
من بيت مكتوم نادتني بلاد الروم
ومن دور المجد لازم لاجله يعاني
ع الاوليه ينافس خيلهم ملزوم
اسرجت عزمي قبل ما اسرج حصاني
وضمرت حظي لاجل يوم شبيه اليوم
ومن كان يرضى ينال المركز الثاني
غيري واما انا احب الاول دوم
ما ارضى بغيره وهذا طبعي وشاني
عليه ماخذ وصيه جدنا مكتوم
حب البطوله سكن دمي وشرياني
بين الترايب ومن اجله اعاف النوم
و احس بالخيل تشبه بعض خلاني
فيها الكرامه وفيها المرجله واللوم
ويوم اجمعوهن ونور الصبح ما باني
والريح عاصوف وامطار وسواد غيوم
نور طريقي بتفكيري وايماني
وعزم على العز به عزه عزيز عزوم
وابيض وجه البشاير منه وافاني
بياض حظ وابيض به بياض علوم
اكاديان الذي اكد بتبياني
فوز اكيد وماكد ثابت ومرسوم
ذكره مخلد بفيرونا ولاكاني
مثله بها وخالد ليوم الحساب يدوم
والفوز اهديه من روحي ووجداني
الى خليفه بتقدير وحب خشوم
وشعب الامارات من قاصي ومن داني
عساه في امن يحيا مكرم ومحشوم