كلمات يجينا الصيف

يجينا الصيف وننتظره واذا عدى نبيه يعود
ونفرح به اذا جانا ونقول الصيف لا يعدي

نحسب حسابنا بدري نفكر في الليالي السود
نفكر كيف نستانس وكيف نجيب ونودي

ندور للوناسه وين شباب قدها وقدود
نسولف مع نجوم الليل ذوات المبسم الوردي

نغير موجه اللهجه حسب جنسيه الموجود
مابين شلون وعاوز ايه وشوبدك ومابدي

بعضنا فلوسه اكثيره وبعضنا بين نقص وزود
وبعضنا مسافر بسلفه وفيزا بس متحدي

يبي ينقط على هذي ويلبس ذيك عقد ورود
يضحكها وهي تضحك عشان يقول من قدي

يظن انه ملك دنياه وودع حظه المقرود
مايدري انه بوضعه غدا في حال متردي

يفاخر بالخطا اللي يصده عن طريق الجود
يضيع نفسه بنفسه ويظن انه بعد مقدي

غلط والغلطه بعشره لرجل يعرف المنقود
خطا واكبر خطا اني اضيع نفسي بيدي

مادام ان العمر يمشي وتالي ذا الجسم للدود
اجل بالله وش حالي اذا حطوني بلحدي