كلمات سنا الهيبة

برق خطف ع الليل و خلف به شقوق
ساق البشاره ومن قبل ودقها يطيح
رحبت بك ترحيبه سقتها سوق
فوق السحابه وصوبك اتدفها الريح

رحبت بك من فوق لن السما فوق
وقدرك بها ياشيخ ما يبغي توضيح
طحنون يا اسم بالافعال مرموق
ويا كلمه تغني عن الفين تصريح

لك طله تبري بها الهم و العوق
يعنالها المغبون ويضوي بها مريح
ولك موقف كالسيف من دون لحقوق
تفصل به الباطل عن الحق واتزيح

ولنك كريم الساس من دم و عروق
مثل النخل جودك بلا من وتلميح
راسخ جذور وشامخ امجاد و عذوق
ومن لابه ما هزت اركانها الريح

بك ميزه تسمو على غيرك فروق
والشمس لاهلت تطفى المصابيح
ما كنك الاٰ من سنا الهيبه مخلوق
ومثلك يابو زايد مهو بحاجه مديح

وانته اخو محمد سما المجد والذوق
يمناه اذا رحب وسيفه اللي مايطيح
شوفك امان الدار وان غبت لك شوق
شوق المطر لين اتتباشر به السيح