كلمات طيارة ورق
طفل صغير ماسك طيارة ورق
شوية و سابها و كانت حجته الزهق
و لما شافها عاليا في السما
قالها ارجعيلي و يجري وراها انما
مهما تجري عمرك ما هتوصلها
عشان كانت في ايديك و انت اللي سيبتها
**********
بقالي كتير مفكرتش فيكي
فافتكرت اني ناسيكي
بس امبارح حلمت بيكي
و عرفت ان اللي افتكرته خيال
انا مقدرش انساكي
عايش على ذكراكي
و معاكي او مش معاكي
قلبي لغيرك عمره ما مال
وحشتيني و وحشتني حكايتنا زمان
نسيتيني و خلصت الحكاية و كان يا مكان
سيبتك من ايدي تضيعي
ازاي؟ هو انا مبفكرش!
كنتي زي العصفورة بتطيري
و انا واقف مبتحركش
طيرتي بجناحات و انا من غير ريش
بعدت المسافات و انا مش عارف اعيش
و اندهك مبتسمعيش و اجري مبلحقكيش
و احلف بايه اني
طول مانتي بعيدة عني
عايش في خوف و قلق
و اتاري قلبِك كان طيارة ورق