كلمات رمز المناصير

جريت من جزل الشعر موال
والجزل من فضل الله اجيبه
لـ دبي قدر ومنزله واجلال
دار الفخر والعز والهيبه
والفكر راهي والبيوت اجزال
قاف يفوق الوصف تركيبه
يجاب في جزل الفعل ويقال
وافخر بـ معرفته واماري به

والطيب المطنوخ ودي به
والمدح يزهى له سعيد هلال
يا طيب وقفاته ويا طيبه
شبحك يابن طراف ماينطال
والفعل خلق الله تذهري به
رمز المناصير وبطل الابطال
وفي الكايده ما يعرف الغيبه
معرب المنسب جزل الافعال
ومجمل ويحمى مواجيبه
والراس طيب والعزوم اجبال
ويباشر الضيفان ترحيبه

والضيف في حكمة معازيبه
وجهه بشوش وسمعته فالعال
عد عذي في مشاريبه
واليا بغيته تاجده فالحال
والطيب والناموس يحري به
على القمم منزاله ولا زال
ولاهي اتضيع الهقاوي به
ومنين ما ثقل الحمل شيال
ومتواضع لـ الصبي والشيبه
ومجلسه لزحول العرب مدهال
وفزاع يوم اغلاه يدري به
يشوف له حر فريد اخصال
ولا لقى به شي يعيبه
أمين ومحنك وطيب فال
وشلون ابوراشد بيصخي به
ند الشبا عساه وبل اخيال
يرويه في ساعه ويرهي به
دار الزحول اللي لهم منزال
وأهل الفخر والعز والهيبه