كلمات استقالة مُسببة
أغنية: استقالة مُسببة
أنا النبي
اللي نادى ع الإله من خنقته لما سعى:
"طبطب علينا لو أنت فاضي للدعا
أو فكها
دي العيشة صعبة ورزقها
لسّاه عنيد"
الغربة أصعب
وده الأكيد على كل حالي
وأنا مش بعيد
ما اعرفش مالي
بس الوجع خلاني أعيد
نفس الكلام على كل روحي بالتمام
وأقعد يوماتي أردده
وفي الختام
لابد
أعيد
وأزيد
يمكن في مرة تنتبه
وتفك قيد
أو حتى تسمع
ويا ريته يشفع
مش عايزة ترجع م القصيد
كل كف بيترفع لسّاه بعيد
ولسه الحُسين خصيم يزيد
ولسه حالي بعبارة أوضح: مش مفيد
حتى السما في الليل الهويد
محتاجة صك
ومصاريف كتير
ورسوم
وختم
وإيصال خزانة
وصيغة حلوة للطلب تكون ضمانة
وللأمانة - من غير سبب- ما فيش إجابة
الخيانة موعودة دايمًا بالغلابة
والديابة على طول بتفرح بالخيابة
والنيابة مجهولها حاضر
من امتى أصلاً الخواطر معمول حسابها مالبداية؟!
الحقيقة
وبدون مبالغة
في النهاية
أنا ابن كلب
أنا مستقيل