كلمات معلش الصبر Malesh Elsabr

أنا لله سلمت الأمر
ماشي بقول معلش الصبر آه آه
أيوة صحيح بتشد الريح
بس أكيد آخرتها بجبر آه آه

حملي تقيل وأنا قده وشلت
شوفت كتير ولا مرة زعلت
أنا طمعان أرتاحلي يومين
كعبي خلاص داب من الأسفلت

نفسي أرتاح والله إن شاء الله يومين في العمر
ياما تعبت وشوفت النجمة في عز الضهر
حكم المولى فضل ونعمة ومش زعلان
زي ما تيجي بايس ايدي وش وضهر

مش طمعان في فلوس بالكوم ولا عايز قصر
ولا طمعان الناس يشوفوني سبقت العصر
أنا مش عايز غير الستر ولقمه حلال
ربنا يرضى عليا ويجبر فيا الكسر

ايه يا هموم والله تعبت
من الأوجاع عجزت وشبت آه آه
شعري أهو شاب والوش شباب
أنا خسران ولا مرة كسبت آه آه

كل ما أقوم ألاقيني وقعت
أنا موجوع ولا مرة وجعت آه
روحت وجيت تعبان وشقيت
بس بإيه من الدنيا طلعت

الأحزان عمالة فقلبي تشيل وتحط
والأفراح مشيت على خط وسابت خط
أنا مولود في الدنيا بحاسب على فواتير
عملت فيا كتير والله وبرضه سكت

شايل حمل تقيل والله وقطمة وسط
حيلي اتهد ومن أوجاعي يا دنيا خلصت
هو اشمعنى الحزن يجيني انا جملة وكاش
بس الضحكة بتيجي يادوب بالعافية وقسط