كلمات هوا دوطن
هوا دوطن هوا دوطن هوا دوطن
ما مې پر شونډو دي په ورځ کي سل توبې وژلي
اوس له تسپو او استغفاره سره نه جوړیږي
یاغي بنده یم د خلوت زولنې چېرته منم
زما بغات ستا له ګفتاره سره نه جوړیږي
زما شهپرونه خدای قفس ته پیدا کړي نه دي
په پنجرو کې له چیغاره سره نه جوړیږي
د ګودرونو د چینار سیوری مې زړه تخنوي
د دې پردیو له چیناره سره نه جوړیږي
نه خرقه پوش نه پر منبر د پرهېز لاپې کوي
پیرِ مغان له ریاکاره سره نه جوړیږي
هغه مین دی پر لمبو شمع په خوب کې ویني
پتڼ له ګل او لاله زاره سره نه جوړیږي
زه د رباب زه د شهباز په ژبه نظم لیکم
دا د شیخانو له دستاره سره نه جوړیږي
جهاني دلته یو رنګي ده د کېمیا په بیه
غزل دې نور له دې بازاره سره نه جوړیږي