كلمات الإسم غزة

الاسم : غزة
أمّا بلادى.. فجميلة جدًّا
وساكتة خالص وهادية جدا
لا فجر أخضر ولا ديك بِيِدَّنْ
ونيلها أَدْمَن طعم البلادَة.

الصهيونيّة.. إحنا وهِيّه
عاملين تعاهُدْ: واحد لِمِيَّه
النصر ليهم.. والموتة ليّا
ومُتنا شهدا عيون الموسادا.

حرب المصالح.. شِرْسَة.. تِقَوِّى
حكومات.. تبرّر لِلّى بيشوى..
ما عرفْت مين أهلى من عدوّى
ده يكيد وده يكيد نفْس الكيادة

أَمَّا لإنُّه.. يبقى فإنُّه
وفى احتمال الألم تجنُّوا
يا دى اليتامى مسموح تِئنُّوا
الموت غزير وليكو الرّيادة!!

يا نايمة قومى ده الفجر فاتِك
نيران بتنزل.. وجَمْر فاتِك
فيه ثوْرة قامت قومى لصلاتِك
الليل بيهرب والفجر نادَى.

سيول نيرانهم سوِّت بيوتى
يا أمَّة غطِّى سَترك بموتى
صوتهم مغطّى على سكوتى
وانا سكوتى معروف يا سادة.

مين اللّى كاسِبْ مين اللّى خاسِر..
يا أمّة حظِّك تَمَلِّى.. عاثر..
فاكرَه ان هَتَفْتى حيطُلّ (ناصر)
يملاكى بالعزم والإرادة.

مهما وِقِعتى إوعى تسامحى
ولو يصالحوا حِسِّك تصالحى
مهما تطيب الجروح ما تمحى
حجم الدّمار ونار الإبادة.

مش باقى م الحبل.. إلّا حَزَّه
والحزّه راسمه ف رقتبى غزّه
سمِّيت جروحها
جهاد.. وعِزة
م العيد دخلنا على جُمادى!!